എല്ലാ മുറിവേറ്റവരെയും പ്രത്യേകിച്ച് റോഡപകടം,ആക്രമണം എന്നിവക്ക് വിധേയരായവരെ ആശുപത്രിയിലെത്തിച്ചാല് പ്രാഥമിക ശുശ്രൂഷ നല്കി മെച്ചപ്പെട്ട ചികിത്സ വേണ്ടിടത്തേക്ക് എത്തിക്കുന്നതു വരെയുള്ള ചുമതല ആശുപത്രികളില് നിക്ഷിപ്തമാണെന്ന് SLP (C) 796/92ല് സുപ്രീം കോടതി വ്യക്തമാക്കിയിരിക്കുന്നു.
കേരളാ പോലീസ് ഡയറക്ടര് ജനറല് 06/2009 ആയി ഇറക്കിയ സര്ക്കുലര്
തിരുവനന്തപുരം
തിയതി 25-01-2009
വിഷയം : റോഡപകടങ്ങളില് പരിക്കേറ്റവരെ ആശുപത്രിയില് എത്തിക്കുന്നവരെ കേസില് സാക്ഷിയാക്കുന്നതു സംബന്ധിച്ച്
റോഡപകടങ്ങളില് പരിക്കേറ്റവരെ എത്രയും പെട്ടെന്ന് ആശുപത്രിയില് എത്തിക്കേണ്ടത് വളരെ പ്രധാനപ്പെട്ട ഒരു പൌരധര്മ്മമാണ്. അങ്ങനെ ചെയ്യുന്ന വ്യക്തികളെ പ്രോത്സാഹിപ്പിക്കേണ്ടതാണ്. ജീവന് രക്ഷാ പ്രവര്ത്തനത്തില് ഏര്പ്പെടുന്ന അത്തരം ഒരാള്ക്ക് പോലീസില് നിന്ന് യാതൊരു വിധ ബുദ്ധിമുട്ടും ഉണ്ടാകാന് പാടുള്ളതല്ല. റോഡപകടങ്ങളില് പരിക്കേറ്റ ഒരാളെ ആശുപത്രിയില് കൊണ്ടുപോക്കുന്ന ആരെയും ആ കാരണംകൊണ്ടു മാത്രം പോലീസ് സ്റ്റേഷനിലേക്ക് വിളിക്കുവാന് പാടുള്ളതല്ല. അവരില്നിന്ന് എന്തെങ്കിലും വിവരം അറിയണമെങ്കില് അവരുടെ സൌകര്യമറിഞ്ഞ ശെഷം അവരുടെ വീട്ടിലോ അവര്ക്ക് സൌകര്യമുണ്ട് എന്നുപറയുന്ന മറ്റേതെങ്കിലും സ്ഥലത്തോ പോയി പോലീസ് അവരില് നിന്ന് വിവരങ്ങള് ശേഖരിക്കണം.
റോഡപകടങ്ങളില് പരിക്കേറ്റവരെ ആശുപത്രിയിലെത്തിച്ച ആളുകളെ അവര് കേസിന് ആസ്പദമായ സംഭവത്തിന് നേരിട്ട് ദൃക്സാക്ഷിയല്ലെങ്കില് കേസില് വിസ്തരിക്കേണ്ട സാക്ഷികളുടെ പട്ടികയില് സാധാരണ ഗതിയില് ഉള്പ്പെടുത്തേണ്ടതില്ല. നേരത്തേ നടന്ന അപകടം മൂലം വഴിയില് പരിക്കേറ്റു ക്കിടന്നയാളെ ആശുപത്രിയില് കൊണ്ടുപോയി എന്ന ഒറ്റ കാരണത്താല് ആരും അപകടത്തിനു ദൃക്സാക്ഷിയാകുന്നില്ല. ഏതെങ്കിലും കേസില് ഏതെങ്കിലും പ്രത്യേക സാഹചര്യം മൂലം ആശുപത്രിയില് കൊണ്ടുപോയ കാര്യം തെളിയിക്കാന് വേണ്ടി ഒരാളെ സാക്ഷിയാക്കണമെന്നുണ്ടെങ്കില് അയാളെ സാക്ഷിപ്പറ്റികയില് ചേര്ക്കുന്നതിനു മുമ്പ് ഒന്നുകില് പ്രോസിക്യൂട്ടറുമായോ അല്ലെങ്കില് ജില്ലാ പോലീസ് സൂപ്രണ്ടുമായോ ആലോചിച്ച് അഭിപ്രായം അരിഞ്ഞതിനു ശേഷമേ അങ്ങനെ ചെയ്യാവൂ.
കേരളാ പോലീസ് ഡയറക്ടര് ജനറല്
മുറിവേറ്റവരെ ആശുപത്രിയിലെത്തിക്കുന്ന നന്മയുള്ള മനുഷ്യര് ഹോസ്പിറ്റല്, പോലീസ് നടപടികള് എന്നിവയുടെ പേരില് ഇനിമുതല് ഉപദ്രവിക്കപ്പെടില്ലെന്നു പ്രത്യാശിക്കാം.